Kryeministri izraelit Benjamin Netanyahu i është drejtuar Asamblesë së Përgjithshme të OKB-së mbi luftën në Gaza, mes presionit ndërkombëtar në rritje dhe njohjes së shtetit palestinez nga gjithnjë e më shumë vende perëndimore.
Benjamin Netanyahu pretendoi se vendi i tij kishte instaluar altoparlantë dhe kishte marrë kontrollin e telefonave celularë të palestinezëve në Gaza, në mënyrë që pengjet të mund të dëgjonin fjalimin e tij. “Dua të dërgoj një mesazh,” tha ai, “Lëreni popullin tim të lirë.”
Në veçanti, pasi përmendi 20 pengjet e mbijetuara që kanë mbetur në Gaza, Netanyahu tha se dëshiron t’u drejtohet atyre drejtpërdrejt nga podiumi i OKB-së.
“Dua të bëj diçka që nuk e kam bërë kurrë më parë. Dua t’u flas pengjeve drejtpërdrejt nga ky forum nëpërmjet altoparlantëve. E kam rrethuar Gazën me altoparlantë të mëdhenj të lidhur me këtë mikrofon në mënyrë që pengjet tona të dashura të mund ta dëgjojnë mesazhin tim. Do ta them së pari në hebraisht dhe pastaj në anglisht.”
“Kryeministri Netanyahu ju flet drejtpërdrejt nga Kombet e Bashkuara. Nuk ju kemi harruar për asnjë moment. Populli i Izraelit është me ju. Nuk do të dorëzohemi dhe nuk do të pushojmë derisa t’ju kthejmë të gjithëve.”
“Falë përpjekjeve të posaçme të kundërzbulimit izraelit, fjalët e mia tani po transmetohen përmes telefonave celularë të Gazës”, shtoi ai. “Prandaj, udhëheqësve të mbetur të Hamasit dhe pengmarrësve, u them tani: ulni armët. Lironi njerëzit e mi, pengjet, të gjithë, 48, lironi ata. Tani, nëse e bëni këtë, do të jetoni. Nëse nuk e bëni, Izraeli do t’ju ndjekë.”
Netanyahu mbante veshur gjithashtu një distinktiv të madh të bardhë me një kod QR. “Shumica e botës nuk e kujton më 7 tetorin, por ne po”, tha Netanyahu, duke treguar distinktivin dhe duke i ftuar njerëzit të skanonin kodin QR që të çon në një faqe interneti në lidhje me sulmet e Hamasit.