Kryeministri spanjoll Pedro Sanchez ka shpallur tre ditë zie kombëtare për viktimat e aksidentit hekurudhor që la të vdekur të paktën 40 persona.
Sanchez premtoi gjithashtu se do të zbulojë arsyen pse dy trenat me shpejtësi të lartë u përplasën në Spanjën jugore, ndërsa ekipet e shpëtimit vazhdojnë të kërkojnë ende në rrënoja.
Më shumë se 120 persona të tjerë u plagosën kur vagonët e një treni që po udhëtonte për në Madrid dolën nga shinat dhe kaluan në shinat e kundërta, duke u përplasur me një tren që po vinte përballë në Adamuz të dielën në mbrëmje.
Aksidenti është më i keqi që vendi ka parë në më shumë se një dekadë.
Operatori i rrjetit hekurudhor Adif tha se përplasja ndodhi në orën 19:45 sipas orës lokale (18:45 GMT) të dielën, rreth një orë pasi një nga trenat u nis nga Malaga duke u drejtuar në veri të Madridit, kur doli nga shinat në një pjesë të drejtë të binarit pranë qytetit të Kordobës.
Forca e përplasjes i shtyu vagonët e trenit të dytë në një digë, sipas Ministrit të Transportit Óscar Puente. Ai shtoi se shumica e të vrarëve dhe të plagosurve ishin në vagonët e përparmë të trenit të dytë, i cili po udhëtonte në jug nga Madridi për në Huelva.
Sa i përket shkakut të përplasjes, ekipet kanë gjetur një dëmtim në shinat e hekurudhës, por ende nuk është e qartë nëse ajo ka qenë shkaku i aksidentit, apo shinat janë dëmtuar pas përplasjes.